كفاية كلام

بلاش رغي فاضي

كفاية كلام

جرايد معارضة

واحزاب مناهضة

وكلة اونطه

وال ايه تمام

....

كبرنا لقينا

مفيش شغل لينا

حاولنا عافرنا

سكتنا 00 مشينا

ف وسط الزحام

....

عشان احنا خيبة

وبنقول دي عيبة

نزعل حبيبنا

دي تبقي مصيبه

ويحصل خصام

....

عيونك ضريرة

ودانك تقيلة

حواجبك دي عيرة

ماتصحي ياريس

مافلت الزمام

....

لو انت حاببنا

وعايز تفيدنا

بقولك فارقنا

ابوس رجل ابنك

ورجل المدام

.....................

كان ياما كان

كان يا ما كان
في الشارع اللي كان زمان
يجمعنا واحنا بنات ضغار
كان كل شئ برضه صغير زينا
الا البيوت والبوابات
كانت كبيرة عننا
كنا نشوف الطير نطير زيه
ونفتح قلبنا
كنا بنمشي والقمر
دايما بيمشي جنبنا
وسعات يروح يبعد بعيد
ويستخبي مننا
واحنا البنات
كنا نجمع بعضنا
نلعب هنا وكمان هنا
نلعب بيوت نلعب سباق
ويعلي صوتنا كلنا
يطلع لنا جارنا الكبير
بفانله بيضا يقولنا
عاملين قلق
ويلا امشو من هنا
نضحك علي شكله
ونكتم ضحكنا
نرجع نكمل لعبنا
ما يهمنا
وده كله كان
في وقت فات عن وقتنا
كنا وكان
في الشارع اللي كان زمان بيضمنا
فاتت سنين
عدت سنين
واتغيرت كل المعاني عندنا
حتي البيوت والبوابات
بقت يادوب علي ادنا
وبقينا بنخاف ل الزمن
يرسم خطوط علي وشنا
اتغير الشارع
تعب
ظهره انحني
من حملنا
من شكلنا
من همنا
كان يا ما كان
اتغير اللي كان زمان بيضمنا